Rosendal FjellStreif er eit offisielt streifarrangement, arrangert for femte året på rad, og godkjent av fylkesmannen i Hordaland. Fysisk aktivitet, lokal matkultur og opplevingar i bonden sitt landskap er berebjelkane i Streif-konseptet.

Rosendal FjellStreif strekkjer begrepet utover det heimlege kulturlandskapet, og opp i fjellet. I sommarhalvåret er beitebruk i vår eventyrlege fjellheim viktig som "næringsbank" for småfehaldet, så vel som rekreasjonskjelde for fastbuande og tilreisande.

Internasjonalt er begrepet "geoturisme" i sterk vekst. Dette er berekraftig turisme som byggjer på lokalt særpreg og minst mogleg inngrep i landskap og kultur.

For Rosendal - landets mest verna bygd - er dette ein type turisme som passar som hånd i hanske når det gjeld visjonen for framtidig landbruks- og reiselivsutvikling. Faktisk er Rosendal FjellStreif for geoturisme å rekna, om vi vel å bruka den merkelappen.